Talisay may igo’ng pundo

CEBU, Philippines - Giklaro ni Talisay City Treasurer Emma Macuto nga may igo’ng pundo ang lokal nga kagamhanan.

Kini ang giklaro ni Macuto human gikataho nga wala na’y security guards ang City Hall gumikan kay wala na’y ikasweldo human gilaslasan sa konseho ang annual budget karong tuiga.

Giklaro sab sa City Budget Officer, Edgar Mabunay, nga pwede pa makaduso og supplemental budget si Mayor Johnny delos Reyes kung gikinahanglan aron dili maapektohan ang mga basic services. Gipahibawo ni delos Reyes nga niduso na siya og supplemental budget diin nag-una niini ang iya’ng intelligence fund alang sa paghimo og mga lakang batok sa krimen ug ilegal nga drugas.

Naglaum si delos Reyes nga bisan mayoriya sa mga sakop sa konseho habig sa oposisyon ang mosanong sa iya’ng mga proyekto alang sa kaayuhan sa katawhan. Gipahibawo usab ni delos Reyes nga nagkauli na ang ilang relasyon tali sa konseho human nga naplantsa ra sa Kapitolyo ang ilang panagsungi. (BANAT NEWS)