Nangawat og motor gigukod nasikop
CEBU, Philippines — Mag-atubang og duha ka kaso ang nangawat og motorsiklo nga nadakpan human sa ginukdanay sa Jagobiao, dakbayan sa Mandaue alas 3 pasado ang takna sa niaging kadlawon. Lakip sa kaso nga ipasaka sa kapolisan mao ang carnapping ug paghupot og kutsilyo.
Si Senior Police Officer 1 Gregorio Cabizares sa Presinto 3 sa Mandaue City Police Office (MCPO) niila sa suspek nga si Rolly Monterde, 23-anyos, lumad nga taga dakbayan sa Iloilo. Matud ni Cabizares nga ang dinakpan ila’ng nasakmitan og kutsilyo hinungdan nga lakip sa kaso nga iya’ng atubangon.
Giingong gisakyan sa suspek ang Honda Wave nga motorsiklo nga gipanag-iya ni Arnel Pepito, 27-anyos nga taga Jagobiao ug gipabulhot sa pagpadagan.
Ang biktima dali nga nakapangayo’g panabang sa mga barangay tanod ug sa kapolisan hinungdan nga gitabangan og gukod.
Naglibot-libot sa Jagobiao ang suspek tungod kay nakamatikod nga adunay nag-atang sa mga eskina hangtud nga nasugatan sa kapolisan ug gidakop. (BANAT NEWS)
- Latest
