Balili case buot ukayon ni Sanchez

CEBU, Philippines - Si Bokal Grecilda Sanchez gustong pabuksan pag-usab ang kaso sa Balili property tungod sa mga dokumento nga iyang nakuykoyan nga giandam kaniadto pa sa namatay na niya nga amahan nga si kanhi bise gobernador Gregorio Sanchez, Jr.

Matud ni Sanchez nga isip chairman sa committee on municipal and provincial property iyahang obligasyon nga masusi ang maong kontrobersiya tungod kay ang Balili property iyaha man sa probinsiya.

Ang maong kaso nga giduso ngadto sa Sandiganbayan giingong hangtud karon wala pa madesisyoni.

Lakip sa gipakita ni Sanchez kagahapon ang mga “news clippings” nga dunay petsa nga 2009 ug 2010 diin apil sa balita ang pagsupak sa kanhi gobernador sa pagpalit sa nahisgutang Balili property tungod kay nalubog kini sa dagat ug dunay parti niini nga kabakhawan. Ang maong kontrobersiya ang hinungdan sa bangi tali sa kanhi bise gobernador ug kang kanhi gobernador ug karon Kongresista Gwendolyn Garcia.

Sumala pa sa dokumento nga gihipos sa iyang amahan, 90 porsiyento sa Balili property ang naglubog sa dagat,  buot ipasabot niini nga kuwang ra ang P37.8 milyones nga gimando sa korte nga ipauli sa pamilyang Balili sa probinsya. Ang P37.8 milyones mao ang gibayad sa 94,526 square meters nga giingong lubog sa dagat ug kabakhawan.

Lakip sa dokumento nga gipakita ni Sanchez kagahapon sa mga tigbalita ang “authority to sale” gikan sa mga heredero o sumusunod sa mga Balili diin lakip sa nabutang niini ang “selling price” o kantidad sa pagbaligya nga P85 milyones ug ang dawaton niini sa pamilyang Balili P65 milyones lamang.

Matud ni Sanchez nga lakip kini sa isugyot niyang ipaubos sa imbestigasyon.

Sa laing bahin, si kanhi gobernador Gwendolyn Garcia nga nahinabi sa mga tigbalita kagahapon pinaagi sa “phone patch” nagkanayon nga dili siya buot mokomento kabahin sa nahisgutang plano ni Sanchez ug dili usab siya mohatag og pagtagad niini tungod kay dili siya interesado. (Brenda D. Batuto/EIM )(BANAT NEWS)