Trak atubangan sa TCPS nasunog

CEBU, Philippines - Naugdaw ang ulohan nga bahin sa mini dump truck nga gikustodiya sa kapolisan sa Talisay, atubangan mismo sa Talisay Police Station niadtong Domingo.

Ang maong truck nga may plate number JEX 607 gipanag-iya ni Maroel Neria nga giingong gidakop tungod sa pagkarga og balas nga walay permit.

Ang mga bombero duol sa police station  dali nga nipasirit og tubig aron mapalong ang kalayo.

Si Senior Inspector Randy Mendaros, Talisay City fire marshal, miingon nga gipaubos pa sa imbestigasyon ang maong hitabo. Apan base sa pasiunang imbestigasyon sumala pa ni Mendaros nga may mga bata nga nagdula-dula sa mini dump truck sayo sa buntag niadtong Domingo.

Sumala pa ni Mendaros nga naabot si Mayor Johny De Los Reyes ug gipapahawa niini ang mga bata. Nasayran usab nga walay baterya ang trak. Apan sa dihang nakabiya na ang mayor gikatahong kalit nga misilaob ang trak.

Nagduda ang kabomberohan nga basin dunay nabiyaan nga upos sa sigarilyo sa sud sa trak hinungdan sa sunog.

Si SPO1 Antonio Albite, imbestigador sa kapolisan nagkanayon nga dunay duha ka saksi nga nakakita sa hitabo ug gikuhaan na nila og pamahayag. Gibanabanang P40 mil ang danyos sa maong sunog.  (BANAT NEWS)