2-anyos gilugos

CEBU, Philippines - Usa ka 50-anyos nga lalaki ang gipaslak sa bilanggoan sa Consolacion Police human giingong nilugos sa 2-anyos nga bata’ng babaye nga  anak sa iyang kinugos diha sa   maong lungsod alas 8:45 sa nakalabay nga gabii.

Matud pa ni Senior Police Officer 1 Marjorie Paller, ang hepe sa Women’s and Children Protection Desk sa Consolacion Police nga nahinabi sa Banat News, gipapuyo ang suspek sa balay sa ginikanan sa biktima tungod kay maninong kini sa bata. Apan niadtong nakalabay nga gabii nasakpan sa magtiayon ang gibuhat sa suspek sa ilang anak dihang  nabalik sila gikan nagpalit og tubig mainom. Sumala pa ni Paller pagsulod sa ginikanan, ilang nakita ang suspetsado nga mao pay pagsuot sa iyang shorts.

Gumikan sa pagduda sa magtiayon nangayo gilayon sila og tabang sa barangay tanod sa ilang lugar ug gidakop ug gihatod sa buhatan sa kapulisan. Kagahapong adlawa nadala na sa kapulisan ang bata sa pink room sa Vicente Sotto Memorial Medical Center aron ipahiling diin nakakuha na sab sila og provisional nga resulta niini. Misamot pa ang pagduda sa kapulisan ug ginikanan sa bata nga kini nahilabtan gayod sa suspetsado gumikan matud pa ni Paller nga nagreklamo ang bata kay sakit ang iyang kinatawo.

Kasong rape in relation sa child abuse ang atubangon sa suspek. (BANAT NEWS)