Nagyawyaw napilde sa hantak gidunggab
CEBU, Philippines- Patay ang usa ka lalaki nga napilde sa hantak human gidunggab gamit ang gidala niya nga kutsilyo sa barangay Uling, dakbayan sa Naga pasado alas 7 sa nakalabay nga gabii.
Ang biktima naila nga si Ruben Payos samtang ang suspek naila nga si Wilfredo Ocan, 44, pulos nagpuyo sa maong barangay.
Matud ni PO3 Ken Cabrera, desk officer sa Naga City Police Station, nga gitug-an sa suspek nga igo lang siya nidepensa sa iyang kaugalingon.
Sumala pa ni Cabrera nga posible’ng gisapot niadto’ng higayuna ang biktima kay katulo na napilde sa hantak ug nagbagulbol.
Paingon na mopauli ang suspek diha’ng iya’ng giagda ang biktima nga mokuyog basin masuko ang tag-iya sa hantakan sa sige niya’ng yawyaw.
Apan nasuko na hinuon ang biktima, nanumbag ug nibunot og kutsilyo dayun dunggab ngadto sa suspek. Abtik nga nasagang ug nabawi sa suspek ang kutsilyo ug gidunggab sa biktima sa makadaghan nga higayun sa nagkadaiyang bahin sa lawas.
Dali pa unta nga gidala sa tambalanan ang biktima apan nakabsan sa iyang kinabuhi samtang gitanggong sa Naga City Police detention cell ang suspek. ()
- Latest
