P15M shabu
CEBU, Philippines - Kapin na sa P15 milyones nga kantidad sa shabu ang nasakmit sa mga awtoridad sa dakbayan sa Sugbo sud lang niining tuiga.
Ang maong gidaghanon nasakmit sulod sa duha ka semana nga buwag nga operasyon sa City Intelligence Branch (CIB), City Anti-Illegal Drugs Special Operations Task Group (CAIDSOTG) ug sa Regional Anti-Illegal Drugs Special Operations Task Force (RAIDSOTF).
Labing ulahi nga nasikop mao ang usa ka suspetsadong drug pusher nga si Danilo Arcilla, 42, sa buy-bust operation sa Sitio Hi-way 77, Barangay Pung-ol Sibugay, niadtong Miyerkules.
Nasikop siya sa CAIDSOTG ug nakuhaan og P1 million nga shabu, nasikop usab sa CIB ug Philippine Drug Enforcement Agency si Marilou Sabello, 54, sa Barangay Mambaling niadtong Lunes diin P6 milyones nga shabu ang nakuha gikan kaniya.
Duha ka adlaw sa wala pa masikop si Sabello, nadakpan sa CIB si Emelyn Dingal, 49, sa Sitio Buli, Barangay Duljo-Fatima ug nakuhaan kini og P1.3 million nga shabu.
Ang hepe sa CIB nga si Superintendent Romeo Santander miingon nga si Dingal ug si Sabello usa ra og supplier.
Una pa niini ang RAIDSOTF nakasakmit ‘sab og P7 milyones nga shabu sa buy-bust operation niini sa Tres de Abril Street, Barangay Labangon, niadtong Pebrero 27 nga miresulta sa pagkasikop sa bata-bata sa usa ka polis nga si Jonathan Cañada, 40, maoy nasikop sa maong raid.
Sa tibuok rehiyon mokabat na og P23 milyones ang nasakmit sa kapolisan sa unang duha ka bulan ning tuiga, mas taas kini og P10 milyones kun itandi sa miaging tuig.
Si Senior Inspector Henrix Bancoleta sa RAIDOTF miingon nga siyam ka barangay sa dakbayan ang grabeng naapektohan sa drugas nga naglangkob sa Kamagayan, T. Padilla, Lorega, Barrio Luz, Pit-os, Pulang Bato, Talamban, Bacayan, ug Duljo Fatima.
Ang Regional Director sa Police Regional Office 7 Chief Superintendent Prudencio Tom Bañas mihagit sa mga hepe sa kapolisan sa dakbayan ug probinsya sa Central Visayas nga kinahanglang malabwan pa nila ang ilang nahimo sa miaging tuig. (BANAT NEWS)
- Latest
