2 ka armado napusilan patay

CEBU, Philippines – Wala nagamit sa usa ka lalaki ang gidala-dala nga .38 revolver human gipusil sa nagsakay og motorsiklo sa sitio Lawis, Pasil, dakbayan sa Sugbo pasado alas 10 sa nakalabay nga gabii.

Ang biktima giila nga si Elmo Sta. Maria, 51, minyo, wala’y trabaho ug nagpuyo sa maong lugar.

Sa imbestigasyon sa kapolisan nasayran nga sa wala pa nahitabo ang pagpamusil, naka-estorya pa sa biktima ang gunman.

Sigun sa mga nakakita nga tunga-tunga sa ilang estorya nakalalis ang biktima ug ang gunman ug kalit lang gipusil ang biktima igo sa likod sa bagol-bagol ug sa    dughan.

Nakasibat ang gunman samtang nakuha sa kapolisan sa crime scene ang duha ka kabhang sa .45 caliber pistol nga gituohang gigamit sa pagpusil ug gikan sa hawakan sa biktima nakuha ang usa ka .38 revolver nga duna’y lima ka bala.

Samtang patay ang 31-anyos nga lalaki human gipusil sa duha ka wala mailhi’ng mamumuno nga  nagsakay og motorsiklo sa sitio Laray, San Roque, Talisay City alas 3:00 sa hapon sa niaging adlaw.

Ang biktima naila nga si James Abapo Abarquez, ulitawo ug nagpuyo sa Proper San Roque sa maong siyudad.

Naglakaw lang ang biktima diha’ng gipusil sa abaga, likod ug sa ulo hinungdan sa kamatayun.

Nasakmit sa kapolisan gikan sa biktima ang usa ka .38 caliber snubnose revolver, upat ka .45 caliber, tulo ka 9mm caliber ug tulo ka pakete’ng shabu sa iyang bulsa. – /GMR) (BANAT NEWS)