High school buildings tukoron

CEBU, Philippines - Gibana-bana nga mga upat ka libo ka tinun-an sa high school ang makabenepisyo sa daghang school buildings nga tukuron sa napulo ka lungsod sa probinsiya sa Sugbo karong tuiga.

Si Gobernador Hilario Davide III ug Roberto Aboitiz, presidente sa Ramon Aboitiz Foundation, Inc. (RAFI) ug si Arden Monisit sa Department of Education (DepEd) Cebu Division, nagpirmahay na og kasabotan alang sa katumanan sa proyekto nga kantidad og P110-million.

Ang mga mayor sa kalungsuran nga makabenepisyo sa nahisgutang proyekto miapil sa pagpirma sa Memorandum of Agreement (MOA).

Ang mga bag-ong building adto tukora sa Calape National High School sa Daanbantayan; Mohon National High School sa lungsod sa Sogod; Sangat National High School sa San Fernando; Mantalongon National High School sa Barili; Marikaban Integrated High School sa Santa Fe; ug Bagalnga Integrated High School sa Compostela.

 Matag usa kanila makadawat og duha ka andana nga school building nga langkuban sa unom ka classrooms.

Ang lungsod sa San Remigio, Catmon ug Carmen National High School ang recipient sa tulo ka andana nga school buildings nga langkuban sa siyam ka classrooms.

Samtang ang Madridejos National High School sa Bantayan Island ang makadawat sa upat ka andana nga school building nga langkuban sa 12 ka classrooms.

Si Davide mapasalamaton sa RAFI sa padayong pagsuporta niini sa probinsiya ilabi na sa pagpauswag sa edukasyon.

Sa maong proyekto ang probinsiya migahin og P39 milyones isip counterpart sa RAFI, samtang ang mga lungsod maoy mohatag og logistical support samtang ang DepEd maoy moatiman sa mga school building.

Si Anthony Dignadice, RAFI Educational Development Unit Executive Director, nagkanayon nga matag classroom nga tukuron magamit sa 60 ka estudyante. Ang construction sa proyekto gikatakdang magsugod sa sunod buwan ug sa kataposan sa tuig matugyan na kini sa mga beneficiary.  (BANAT NEWS)