Basura paliton sa Mandaue

CEBU, Philippines - Mokabat sa P500 mil ang gigahin sa kagamhanan sa dakbayan sa Mandaue alang sa ilusad nga programa nga gitawag og “Basura Mo, Kapahimuslan Ko” nga gikatakda’ng sugdan niining semanaha.

Kini maoy gitug-an ni Engineer Ricardo Mendoza nga maoy City Environment and Natural Resources Officer (CENRO) nga mao usab ang pangulo sa Solid Waste and Management Office.

Base sa maong programa ang mga basura gikan sa nagkadaiya’ng kabalayan  pagabayloan kini og mga grocery items nga naglakip sa kinilo’ng bugas, sabon panglaba, sardinas, coffee ug uban pa.

Ang gidaghanon sa grocery items nga ibugti sa dad-on nga basura  mag-agad usab sa gidaghanon ug gibug-aton.

Dugang ni  Mendoza nga mahimo’ng kaabag sa pagpatuman sa maong programa ang kahugpongan sa urban poor sa dakbayan nga maoy magsilbi’ng coordinator ug ang Barangay Subangdaku mao usab ang himuon nga “pilot area” sa programa.

Ang gahin nga salapi alang sa maong programa  mahimo’ng mobalik gihapon kay ang basura nga matigom  mapatimbang man kini ngadto sa mga negosyante og recycle  items o mga scrap nga basura.

Si Lita Balani, tsirman sa maong kahugpongan sa urban poor, miingon nga ang nagpuyo sa kabarangayan mao  gayud ang angay mag-una sa pagsulbad sa problema  sa basura sa ilang dapit sanglit sila man gayud maoy unang maapektohan sama sa mga pagbaha.

Giangkon ni Balani nga ang paglambigit kanila’ng urban poor  sa kagamhanan sa kampanya paghipos sa basura dili gayud sila maglisod sa  pagpatuman kay sila nga mga kabus maoy nasinati sa ilang tagsa-tagsa ka mga lugar.

Matud ni Mendoza nga kinahanglang bahigon daan ang mga basura nga dad-on sa drop-in center.

Kini pinaagi sa paglain sa basura nga ma-recycle, lainon ang madunot sama sa papel, sagbot o biya nga mga utanon o prutas ug ilain usab ang dili madunot nga basura sama sa plastic, botelya ug uban pa.  (BANAT NEWS)