Shootout, usa patay

CEBU, Philippines - Patay ang usa ka lalaki samtang nasikop ang iyang kauban human sila gikatahong nakigpinusilay sa mga polis sa lungsod sa Dalaguete.

Ang mga suspek gigukod sa mga polis human ilang gipusil sa miaging gabii si Police Officer 2 Reynaldo Vidas sa Barangay Saksak sa maong lungsod, si Vidas nadestino sa maong lungsod.

Ang namatay naila nga si Resty Rodrigo, 34, giila nga “gahi” sa maong lugar ug usa sa gi-monitor nga drug personality sa maong lungsod apan taga Sitio Cambangyao,Poblacion Dalaguete.

Samtang nadakpan iyang kauban nga si Jovan Mariscal, 19, nga taga Jolomaynon, Dalaguete.

Matud pa sa Officer In-Charge sa kapulisan sa maong lungsod nga si SPO3 Cleto Pia nga nahinabi sa Banat News pauli na si PO2 Vidas aron manihapon dihang iyang nasigpatan ang duha nga kadudahan ang lihok ug nagbarog sa ilang lugar.

Apan sa mobalik na siya sa police station  nabantayan niya nga naa gihapon ang duha sa ilang giestambayan hinungdan nga iya kining giduol, apan wala pa kini nakaestorya giingong gipusil na ni Rodrigo sa iyang tiyan ug bukton si Vidas.

Nakaibot sa iyang .9mm pistol service firearm si Vidas ug nakabalos og pusil kang Rodrigo hinungdan nga misibat ang duha , gikatahong naigo sa bukton si Rodrigo.

Wa masakpi sa roadblocks ug followup operations ang duha apan kagahapon sa buntag natultolan sa mga polis ang ilang gitagoan sa utlanan sa barangay Saksak ug barangay Jolomaynon duol sa usa ka sapa.

“Murag nababoy ni sila sa area nga wala na man sila’y kalutsan kay naka poste na man sa mga possible exit nila ang mga kauban nato,” sumala pa ni Pia.

Nakuha sa kapulisan gikan sa miisa dayon sa mga kamot nga si Mariscal ang usa ka .357 revolver nga duna’y lima ka mga bala.

Dali usab gitudlo ni Mariscal ang gitagoan ni Rodrigo sa usa ka kawayanan sa maong dapit  apan dihang giadto kini sa mga polis giunhan niini pagpusil si SPO3 Pia apan nakamatikod kini ug nakaligid sa yuta padung sa kabatohan.

Abtik ‘sab nga nakabalos ang mga polis hinungdan nga napatay ang suspetsado. Sumala pa ni Pia, napriso na kaniadto sa kasong murder si Rodrigo apan gipagawas human wa mokiha ang mga reklamante.

Gitanggong na sa karsel sa Dalaguete Police Station si Mariscal samtang nagpaalim sa tambalanan si PO2 Vidas. (Jojo C. Ugdol/EIM)(BANAT NEWS)