MCC ni Cañete nag-Sinulog

CEBU, Philippines - Gisaulog sa Mandaue City College-Canduman campus ang kapistahan ni Senyor Santo Niño pinaagi sa pagpahigayun og Sinulog karong tuiga.

Ang tunghaan nga gidumala sa presidente nga si Dr. Paulus Mariae Cañete adunay ilang kapilya sulod niini.

Ang mga tinun-an sa nagkadaiyang kurso nga naglakip sa Bachelor of Science in Education, BS Marine Transportation, Criminology ug uban pa ang nisalmot sa pagsayaw sa Sinulog.

Gawas sa ganti’ng salapi, halad usab ngadto sa Balaang Bata ang gihimo sa mga tinun-an nga pagsayaw.

Samtang gisalmutan sab sa pundok sa batan-ong  kabataan ang susamang kalihukan sa sitio Anakma, Pagsabungan, dakbayan sa Mandaue.

Si Raul Ruiz, chairman sa ANAKMA Inc. nga kahugpungan sa urban poor sa nahisgutang lugar, niingon nga naandan na sa matag tuig ang ilang pagsaulog sa ilang kapilya sa kapistahan ni Senyor Sto. Niño. Kini isip pagpasalamat sa Labaw’ng Makagagahum sa tibuok tuig nga mga grasya ug panalangin nga ilang naangkon sa mga molupyo sa maong lugar.

Si Ruiz niingon nga nagkadaghan ang mga contingents nga mosalmot sa Sinulog sanglit gawas nga ilang gipadak-an ang ganti, gibuksan sab sa pagsalmot ang gikan sa laing kabarangayan.  (BANAT NEWS)