Duha ka pushers nadakpan

CEBU, Philippines - Nadakpan ang gikatahapang pusher og shabu sa buy-bust operation sa sitio Sto. Niño, barangay Guizo, dakbayan sa Mandaue alas 11 pasado ang takna sa niaging gabii ug nasakmit ang duha ka paketeng shabu ug ang marked money nga gipalit niini.

Si Police Officer 2 David Omambac sa Presinto 1 sa Mandaue City Police Office (MCPO) miila sa nadakpan nga si Romeo Sotto, 33-anyos.

Matud ni Omambac nga nakadawat sila og mga taho labot sa ilegal nga kalihukan sa suspek nga maoy nakaaghat kanila sa pagpaniid sulod sa pipila ka adlaw.

Laing nadakpan mao si Ariel Bontia, 46 anyos, taga barangay Cogon East, lungsod sa Carmen kinsa nasakmitan og tulo ka paketeng shabu.

Si SPO2 Simplicio Gibo sa Carmen Police Station miingon nga nakadawat sila og tawag sa telepono gikan sa nagpakabana nga molupyo nga nangayo og police assistance labot sa usa ka tawo nga nag-wild.

Ang ilang hepe nga si Inspector Ricardo Echavez ug kauban ang nihimo og pakisusi ug ilang naabtan sa maong dapit ang suspek. Dali nila’ng gipusasan ang suspek ug dihang girikisa ang kalawasan, maoy nadiskubrehan ang dala nga tulo ka paketeng shabu nga gisulod sa bulsa. (BANAT NEWS)