P700mil shabu nasakmit

CEBU, Philippines - Nadakpan sa kapolisan ang lima ka mga lalaking nalambigit sa ilegal nga drugas, diin tulo kanila giingong mga drug pushers atol sa gihimong tulo ka managlahing operasyon.

Nasikop sa mga sakop sa Provincial Intelligence Branch sa Cebu Provincial Police Office ang usa ka Rodel Barinas Quijano, 39, diha sa balay niini sa Sitio Tawog, Barangay Valladolid sa dakbayan sa Carcar.

Nakuha kaniya ang kapin P700 mil nga gituohang shabu atol sa buy-bust operation nga gilusad sa grupo ni Inspector Leo Logroño human sa duha ka semanang pagpaniid kaniya. Matud pa ni Logroño notadong pusher sa  dakbayan sa Carcar ang suspek.

Miingon si Logroño nga usa ka poseur buyer ang mipalit sa suspek bali’g P300 nga shabu ug sa pagtunol sa drugas dali kining gisikop ug nakuhaan  og duha ka dagkong putos, duha ka medium-sized nga putos ug 10 ka gamay nga putos sa gituohang shabu.

Base sa presyo sa Dangerous Drugs Board, ang nakuhang 60 gramos nga shabu kang Quijano mobalor og P708, 800.

Nakuhaan ‘sab kini og usa ka kalibre .9mm nga pistola nga may sulod nga lima ka bala.

Samtang usa ka Ryan Payao Tamayao, alyas Pikat, 29, nga giingong idlas nga gipasanginlang drug pusher sa Sitio Pandan, Barangay Kawit, Medellin ang nadakpan sa buy-bust operation sa kapolisan sa maong lungsod.

Si Senior Police Officer 2 Jovito Abella sa Medellin Police Station miingon nga napalitan kini og usa ka paketeng shabu bugti sa P200 nga marked money.

Nakuha usab kaniya ang kwartang P150 nga gituohang halin, marked money ug usa ka paketeng shabu. Nadakpan usab sa mga sakop sa Carbon Police Station ang laing gipasanginlang tigpayuhot og shabu ug duha ka giingong tigpalitan niini og drugas diha sa luyong bahin sa One Citilink Terminal, Barangay Pahina-Central sa dakbayan sa Sugbo.

Ang mga nasikop naila nga si Angelito Villaruel, 38, taga South Bus Terminal ug ang giingong iyang mga customer nga sila si Junel Abatayo, 18, ug si Jun Miko Belarmino. Ang buy-bust operation gipangulohan ni Chief Inspector Noel Lomente inabagan ni SPO1 Artemio Tumakay ug mga kaubanan.

Matud pa gipalitan ang suspek og usa ka paketeng shabu nga balor P100 hinungdan sa pagkasikop niini, dugang duha ka gamay nga paketeng gituohang shabu  ug ang buy-bust money ang nakuha gikan sa suspek.

Samtang sila si Abatayo ug Belarmino nga naatlan nga namalit og shabu niadtong tungora gisikop sab sa kapolisan human nakuhaan og tagsa ka paketeng shabu. Ang mga dinakpan gikatakdang pasakaan og kaso ugmang adlawa tungod sa kalapasan sa Comprehensive Dangerous Drugs Act of 2002.  (BANAT NEWS)