Indian gitulis sa Medellin

CEBU, Philippines – Gitulis sa duha ka armadong tulisan nga nagsakay og motorsiklo ang kinolekta sa tigpatanto nga Indian sa barangay Kawit, lungsod sa Medellin ala una pasado ang takna sa hapon niadtong Lunes.

Si SPO2 Jovito Aballe, desk officer on duty sa Medellin Police Station, niila sa biktima nga si Tarsen Singh, 40, minyo ug nagpuyo sa Solid Homes Subdivision, Taytayan, dakbayan  sa Bogo.

Asoy sa biktima nga gikan pa siya nangolekta sa mga utangan sa lungsod sa Daanbantayan sakay sa iyang motorsiklo dihang gisundan siya og itom nga motorsiklo nga giluwanan sa duha ka tawo.

Paghidangat na sa barangay Kawit, lungsod sa Medellin, ni-overtake ang motorsiklo sa mingaw nga lugar ug nibabag sa dalan dayong sinyas sa biktima sa pagpahunong.

Nihunong ang biktima ug giduol sa usa sa lalaki ug mition og armas dayun deklarar og tulis uban sa pagpangayo sa iyang kuwarta.

Si Aballe miingon nga gihatag sa biktima ang dala niining kuwarta nga mokabat sa P20,000  ug dayun pabulhot sa duha ka tulisan.

Matud ni Aballe nga niadtong buwan sa Disyembre nahitabo usab ang susamang modus sa pagpanulis sa usa ka delivery van sa barangay Tapilon, lungsod sa Daanbantayan. – /GMR) (BANAT NEWS)