Karaang merkado hawanan

CEBU, Philippines – Nangita pa ang kagamhanan sa dakbayan sa Mandaue og kontraktor nga moguba sa nahabilin nga bahin sa nasunog nga merkado luyo sa National Shrine of Saint Joseph.

Ang pagpaguba sa nahabilin nga istraktura mao’y una’ng  himuon sa dili pa magsugod ang kaugmaran sa tukuron nga bag-ong merkado nga giplano ni Mayor Jonas  Cortes.

Si Market Administrator Mosuline Suliva nga nahinabi sa Banat News niingon nga ang mga sakop sa Bids and Awards Committee nagpatawag na unta og bidding alang sa pagpili og kontraktor nga moguba sa istraktura.

Sa maong bidding nasayran nga usa lang ka kontraktor ang nitambong nga nagpakita og tinguha nga mao’y moguba sa nahisgutang istraktura.

Gitataw ni Suliva nga kinahanglan una nga hawanan ang maong lugar sa dili pa magsugod ang kaugmaran sa mokabat P300 milyones nga kantidad sa proyekto.

Gitug-an ni Suliva  nga kun masugdan na sa pagguba ang nahabilin nga istraktura sa daan nga merkado, hayan masugdan na ang pagtukod sa proyekto karong Abril o Mayo.

Matud ni Suliva nga wala pa hinuon matino ang kontraktor nga motukod sa proyekto sanglit ipahigayun pa ang bidding niini.

Kahinumduman nga maoy una’ng giplano ni Cortes ang pagpatukod sa walo ka andana nga government center sa luna sa karaang merkado.

Apan dihang nitay-og ang 7.2 magnitude nga linog nga nakaingon sa pagkaguba sa bag-ong merkado luyo sa Mandaue City Sports and Cultural Complex, nakahukom ang mayor sa pagbalik sa merkado sa kanhi nahimutangan niini. (BANAT NEWS)