Danyos ni Seniang

CEBU, Philippines -  Ang Office of Civil Defense (OCD) 7 nagpahigayon na og rapid assessment aron pagtino sa damage sa bagyo nga mikalas og kinse ka tawo, pito ang missing ug unom ang naangol sa Central Visayas.

Si Joy Hernandez, training officer sa OCD-7, mibutyag nga kadaghanan sa ilang mga sakop gipadala na sa mga lugar nga naigo sa bagyo sama sa Bohol ug sa southern Cebu.

Matud niya, ang 12 ka nakalas pulos taga Ronda, tulo sa Bohol , lima ang missing sa Cebu ug usa sa Bohol. Samtang tulo ang angol sa Bohol ug tulo sa Negros Oriental.

Ang Police Regional Office 7 mibutyag nga dunay usa ka bata nga napalgang patay sa Moalboal.

Sa Pinamungajan, naangol sila si Ruel Taping, ug Mariel Taping 14, human napiit sa nahagsa nga “Buli” niadtong Martes sa kaadlawon.

Ang Badian police mibutyag nga dunay 20 ka tiil nga gilapdon ug napulo ka tiil nga gilawmon nga sinkhole ang nadiskubrehan sa Purok 3, Barangay Manduyong, sa Badian.

Ang Department of Public Works and Highways misusi na sa nangagubang taytayan alang sa pag-repair niini ilabi na sa Sibonga ug sa Transcentral Highway nga nalumpag tungod sa pagbunok sa uwan.

Samtang ang Armed Forces of the Philippines-Central Command nangandam na sa C-130 plane aron maghatud og food packs ug tambal sa mga apektadong lugar.

Ang Department of Health nagpadala na og dugang tambal sa Tubigon, Bohol samtang ang Department of Social Welfare and Development 7 personnel mosugat sa Bag-ong Tuig diha sa repacking centers.

Ang Department of Trade and Industry mipasalig nga daghang pagkaon nga mapalit sa kamerkadohan ug walay price increase sa mga basic commodities.    

Samtang si Ethel Natera, public information officer (PIO) sa probinsiya mibutyag nga dili makadeklara og state of calamity ang Provincial Board tungod kay ubos pa sa state of calamity ang lalawigan human sa bagyong Ruby sa milabay’ng usa ka buwan.

Gipasabot ni Natera nga ang state of calamity malibkas human pa sa 60 ka adlaw o duha ka buwan gikan sa pagdeklarar niini.  (BANAT NEWS)