Karera machines nag-operate sa Toledo

CEBU, Philippines -  Nasakmit sa kapolisan sa dakbayan sa Toledo ang duha ka karera machines atol sa pagronda sa may Climaco extension, Poblacion sa maong dakbayan.

Usa ka concerned citizen ang nipahibawo sa kapolisan labot sa ilegal nga kalihukan sa sugal ang naglihok sa maong dapit gamit ang karera machines.

Hinungdan nga daling nilusad og pagronda ang kapolisan nga gipanguluhan ni PO3 Ronald Caño, PO2 Romeo Jaranilla, PO2 Melchezedick Batomalaque ug PO1 Readan Lara.

Usa ka abandonadong panimalay ang nakuhaan sa duha ka karera machine apan wala’y naabtan ang kapolisan nga nagduwa samtang naka-eskapo ang gituohang caretaker sa maong ilegal nga sugalan.

Gikustodiya na sa kapolisan ang karera machines samtang padayong sutaon sa kapolisan ang nanag-iya niini. (BANAT NEWS)