Masahista gidunggab sa kauban

CEBU, Philippines - Usa ka babaye’ng masahista ang nadunggaban sa iyang kauban sa trabaho sa Mactan Proper, barangay Mactan, dakbayan sa Lapu-Lapu sa niaging alas 2:10 kagahapon sa kadlawon human sa panaglalis.

Si Violeta Greolin, 39-anyos, residente sa sitio Buyong, Maribago, ang nakaangkon og samad dinunggaban sa iyang likod human dunggaba ni Hanah Jean Valdez, 31-anyos, taga sitio Guisi, Agus, sa maong dakbayan. Naangol ang laing masahista nga si Margie Marmis, 22-anyos, taga sitio Bagong Bayan, Maribago.

Sa inisyal nga imbestigasyon ni SPO2 Allan Pantaleon sa Lapu-Lapu City Police Office-Homicide Section nasayran nga gikasab-an ni Greolin si Valdez sa giingong sayop nga pagmasahe sa ilang kustomer nga nisangko sa pagpanaglalis.

Si Valdez nihagit og sukmagay ni Greolin ug sa iyang kalagot, daling nikuha og mahait nga hinagiban dayun duslak sa biktima.

Ang laing kauban nga si Marmis nga nakakita sa insidente nisuway og ilog sa hinagiban apan naapil og ka hiwa ang iyang tuo nga kamot.

Si Greolin ug Marmis daling gidala sa tambalanan samtang ang suspek gidakop sa mga nirespondeng kapolisan ug gikatakda nga pasakaan og kasong attempted homicide ug slight physical injury. (BANAT NEWS)