P68 mil nga drugas nasakmit sa buy-bust

CEBU, Philippines – Nasikop sa mga sakop sa City Intelligence Branch (CIB) sa Cebu City Police Office (CCPO) ang 37-anyos nga lalaki nga nakuhaan og P68,000 nga kantidad sa drugas atol sa buy-bust operation sa sitio Paray, barangay Kasambagan alas 11 sa nakalabay nga gabii. Ang dinakpan naila nga si Ramel Belayo, minyo, kinsa taud-taud na nga gisundan sa kapolisan. Sumala pa ni Insp. Gomersendo Mandawe, deputy chief sa CIB, nga nagsige lang og balhin-balhin og lugar nga gipuy-an si Belayo human nagtagotago gumikan sa kaso’ng paghupot og armas.

Human nasayri sa CIB ang ilegal nga negosyo ni Belayo dali’ng nihimo og test buy ang asset sa kapolisan gamit ang P300 ug niresulta sa pagkasikop sa suspek. Nakuha sa kapolisan ang duha ka medium size ug lima ka gagmay nga pakete sa gituohang drugas nga mikantidad og P68,000.

Atol sa maong operasyon giapil sab og sikop sa mga polis ang usa ka Reynaldo Vallenas, 34, taga barangay Subangdaku, Mandaue kinsa didto sulod sa balay ni Belayo ug nakuhaan og usa ka disposable lighter, duha ka linukot nga tissue ug duha ka linukot nga aluminum foil.

Gawas sa kaso sa drugas gitug-an ni Mandawe nga mag-atubang sab og kaso sa paghupot og ilegal nga armas si Belayo human nasayri nga duna kini’y warrant of arrest nga giisyu ni RTC Judge Generosa Labra sa Branch 23.

Gibalhug na sa CCPO detention cell ang duha ka dinakpan. – /GMR) (BANAT NEWS)