Pagbantay sa duha ka taytayan pahugta

CEBU, Philippines -  Aron malikayan ang lain pang insidente sa paghikog diha sa Mandaue-Mactan Bridge ug Marcelo Fernan Bridge,  ang mga opisyal sa Mactan Cebu Bridge Management Board (MBMB) misugyot sa pagbutang og mga precautionary measure sa lugar.

 Duha sa ilang gisugyot mao ang pagpaayo sa “paging system” sa duha ka taytayan ug ang pagbutang og blue guards.

Si Chief Inspector Alvin Gumacal, deputy sa Regional Maritime Unit-7 nga naa magbase sa ilawom sa Marcelo Fernan Bridge ug Mandaue-Mactan Bridge nagkanayon nga mibuhat na sila og draft proposal sa pagpaayo sa paging system.

Matud niya ang paging system dako og matabang sa mga nagbantay sa Close Circuit Television (CCTV) camera diin mabadlong ang mga nagplanong moambak diha sa tulay.

Niadtong milabay’ng buwan nakuha sa footage sa CCTV diha sa Mandaue-Mactan Bridge ang pag-ambak sa usa ka babaye.

Subay niini, si Gobernador Hilario Davide III gustong mapaayo dayon ang paging system dili lang aron gamiton pagbadlong sa mga maghikog kondili lakip kadtong mga tawong magtapok-tapok sa tulay kay delikado kini sa disgrasya.

Gawas niini gikatahong dunay mga bata usab ang mabantayan nga magdagan-dagan o magduwa-duwa diha sa tulay.

Base sa incident report ni Leo Jim Bacus, system analyst sa Traffic and Security Monitoring System sa maong taytayan, sa buwan sa Nobiyembre niining tuiga usa ang nahitabong suicide incident ug tulo ka suicide attempt niining buwana.

Sa ulahing status 27 sa 40 ka CCTV cameras ang nag-function sa duha ka tulay.  (BANAT NEWS)