Suspek sa lugos hapit maghikog

CEBU, Philippines - Boluntaryong nidangop sa kapolisan ang usa ka 44-anyos nga lalaki human gipasanginlan nga nilugos sa 45-anyos nga babaye sa bunkhouse sa usa ka subdivision sa lungsod sa Liloan.

Ang gireklamo naila nga si Arnulfo Manulat, minyo ug taga Yati sa maong lungsod ug maintenance worker sa usa ka subdivision.

Matud ni SPO3 Octavio Dela Paz, ang desk officer sa Liloan Police,  nga ang babaye giingong dunay diyutay nga problema sa pangisip ug gipahimuslan sa suspek.

Sigun pa ni Dela Paz nga niadtong nakalabay nga kadlawon nabantayan sa igsuon nga kadlawon na nga nauli sa ilang balay ang biktima gikan sa bunkhouse ni Manulat.

Sumala pa nga igo lang niadto sa bunkhouse ang babaye ug wala gi-kidnap sukwahi sa pasangil.

Desidido gyud nga mopasaka og kaso’ng pagpanglugos ang pamilya sa biktima gumikan sa giingong pagpahimulos sa suspek luyo sa kahimtang sa biktima.

Samtang hapit naghikog ang usa ka lalaki kinsa gidakop nunot sa reklamong pagpanglugos sa usa ka 17-anyos sa mao gihapon nga lungsod.

Gitugyan sa Consolacion Police ngadto sa Liloan ang usa ka 44-anyos nga si Miguel Cuyos, ulitawo ug drayber sa habal-habal nga taga Casili Lamak, Liloan.

Matud ni Cuyos nga wala niya gilugos ang 17-anyos ug nag-ipon na sila pagpuyo sulod sa kapin usa ka buwan sa Tayud, Liloan.

Sigun sa inahan sa biktima nga dugay na niya gipangita ang iyang anak ug nahibaw-an nga nag-ipon na ug si Cuyos.

Sigun pa ni Dela Paz nga gumikan sa gibati nga kahiubos ni Cuyos nga kini gipriso sa kasong rape misulay kini pagpakamatay sulod sa prisohan ug nangita og pisi apan nabadlong  sa kauban nga piniriso.

“Mao to ako na lang siya nga gitambagan nga dili lang pud intawon kay basin madala ra na og hangyo, wala gyud lagi daw niya gilugos ang 17-anyos, mao lagi daw miadto sa ilaha ug nakig-ipon,” sumala pa ni Dela Paz.

Usa sa plano ni Cuyos nga hangyoon na lang ang mireklamo nga inahan nga minyoan na lang ang iyang anak bisan pa man og giingnan siya sa usa ka kaubang piniriso nga siya nakatilaw na sab sa maong babaye.

Gihulagway sa polis nga may hitsura sab ang maong babaye nga andam minyoan ni Cuyos bisan pa man sa mga estorya nga iyang nabati.

Giingong nag-away ang biktima ug ang suspek hinungdan sa pagpauli sa babaye sa iyang ginikanan sa Casili, Consolacion.

Dihang giapas sa suspek nanawag sa buhatan sa kapolisan sa Consolacion ang mga ginikanan sa 17-anyos nga babaye hinungdan sa pagkasikop. (Jojo C. Ugdol ug Romeo T. Limpangog/GMR)(BANAT NEWS)