Asset gipatay

CEBU, Philippines - Patay ang usa ka 48- anyos nga babaye nga gituohang asset sa kapolisan human gipusil diha sa haya sa iyang silingan sa Sitio Callejon II, Salvador Street, Barangay Labangon ning dakbayan sa Sugbo.

Ang namatay giila nga si Helen Ynot, nagpuyo sa lugar kinsa nakaangkon og daghang samad pinusilan human kini gitiwasan sa pagpusil sa killer niini.

Matud pa ni Police Officer 1 Michael Angelo Singson sa Homicide Section sa Cebu City Police Office (CCPO) nga nahinabi sa Banat News nag-mahjong ang biktima dihang kalit lang miabot ang gunman nga nag-helmet ug mipusil sa biktima sa dughan.

Dihang natumba, giduol kini sa lalaki diha sa gihagbaan ug gitiwasan pagpusil igo sa ulo ug liog hinungdan sa iyang hinanaling kamatayon.

Ang mga tawong nagbilar nagkatibulaag og panagan tungod sa nahitabo apan wala’y nakaila kanila sa mamumuno tungod kay nagsuot kini og full-faced helmet.

Human sa pagpamusil, mibalik ang gunman sa nagpaabot niining kauban nga giingong nagmaskara og “Batman” ug mipasirit palayo luwan sa usa ka motorsiklo.

Apan giingong gibilin sa mga mamumuno ang maong helmet ug ang maskara usa ka gatos ka metros gikan sa crime scene.

Duna unta’y close circuit television (CCTV) nga nakamuntar sa taas sa poste sa maong lugar nga iya sa barangay apan matud ni Police Officer 1 John Erick Samosa sa Homicide Section nga sa ilang pagsubay, wala kini nag-andar.

Ang trabaho sa biktima nga gituohang asset sa kapulisan maoy gidudahan karon sa kapulisan nga motibo sa pagpatay kaniya, apan wala ‘sab gipadaplin ang anggulo nga duna kini nakaaway.

Nakuha sa kapulisan sa crime scene ang tulo ka basiyo sa .45 caliber pistol nga gituohang gigamit sa mamumuno.

Hangtod karon nagpadayon pa sa imbestigasyon ang kapulisan aron pag-ila ug pagsikop sa mihimo sa krimen. (Jojo C. Ugdol/EIM)