Gidemolis kilid sa Mahiga Creek hatagan og cash assistance

CEBU, Philippines - Makadawat og P17, 200 ang napulo sa 34 ka mga tag-iya og panimalay sa Mahiga Creek sa Sitio Mahayag ug Sitio Mahusay sa Barangay Subangdaku, dakbayan sa Mandaue nga nalakip sa gidemolis sa kagamhanan.

Si Tonypet Juanico, pangulo sa  City Housing and Urban Development Office (HUDO) mipadayag nga ang financial assistance giandam na sa City Accounting Office ug mahimo na kining ihatag ngadto sa mga  benepisyaryo.

Sa nasayran nga niadtong miaging Huwebes sa buntag nahitabo ang kagubot tali sa kapin 30 ka informal settlers dihang ang mga sakop sa demolition team nga gipangulohan ni Carlo Ybañez mi-demolish sa mga tolda.

Si Juanico miingon nga  13 sa 34  ka mga pangalan sa mga informal settlers nga gisumitir sa Sanlakas  ang giberipika tungod kay wala sila’y records sa ilang buhatan.

Si Juanico miingon nga adunay upat ka mga pangalan nga beneficiaries sa  6.5-hectare relocation site sa Barangay Paknaan ug ang tulo kanila nakapirma na og waiver nga nagtugot sa pagbaligya sa giukopar nilang luna.

Samtang adunay duha nga nakadawat na og bayad alang sa ilang luna ug usa usab kanila ang nakadawat na og P10,000 nga livelihood assistance gikan sa dakbayan. (BANAT NEWS)