Fluvial procession malampuson

CEBU, Philippines - Kapin sa 50 ka bangka’ng de motor ang niapil sa ika-14 nga fluvial procession sa Nuestra Señora Birhen De Regla ug ang pagsugod na sa siyam ka adlaw sa Novena mass sa dakbayan sa Lapu-Lapu.

Ang kalihukan gihimo isip kabahin sa pista sa Opon karong Nobiyembre 20 ug 21.

Gawas sa mga gagmay’ng bangka, dunay pipila ka tagdumala og beach resorts ang niapil sab sa fluvial procession.

Lainlaing matang sa buwak ang gipangsabwag sa kahanginan pinaagi sa mga para-sailers atol sa pag-agi sa patron didto sa Marcelo Fernan bridge ug sa unang taytayan paingon sa Muelle Osmeña, ang pantalan sa dakbayan sa Lapu-Lapu.

Si Lapu-Lapu City Mayor Paz Radaza ug mga konsehal sa siyudad maoy nagtinabangay sa pag-alsa sa andas nga gitindogan sa balaang patron sa Lapu-Lapu. Walay problema nga mitumaw atol sa pagprosesyon sa imahen gikan sa Pacific Cebu Resort sa Barangay Suba-Basbas ug midunggo sa Muelle Osmeña. Gipaabot nga mosamot nga mograbe ang problema sa trapiko paingon sa dakbayan sa Lapu-Lapu sugod karong sunod semana kun magkaduol na ang pangilin sa Birhen sa Regla. (BANAT NEWS)