Awto, armas, drugas sakmit sa ronda
CEBU, Philippines – Lakip sa nasakmit atol sa duha ka managlahing buy-bust operation sa dakbayan sa Lapu-Lapu sa miaging Biyernes sa hapon ang usa ka awto.
Nadakpan sa kapolisan sila si Ricky Manuel, 35, ug Rodrigo Siroy, 34, pulos taga Sitio Takan, barangay Ibo kinsa nakuhaan og duha ka medium size nga pakete sa shabu ug duha ka gagmay’ng pakete, usa ka pusil ug awto sa entrapment operation sa Punta Rizal, barangay Pajo sa maong dakbayan.
Matud ni Police Senior Inspector Wilbert Parilla, hepe sa Lapu-Lapu City Police Office (LCPO) Station 3, nga usa ka level 2 drug pusher si Manuel kinsa nakuhaan og duha ka medium size nga pakete sa shabu ug usa ka .45 cal. nga pusil. Nasakmit usab kang Rodrigo ang duha ka gagmay’ng pakete sa ginadiling drugas.
Nalakip sa gisakmit ang Hyundai Black Sedan nga may plate number nga GSJ 274 nga gipanag-iya ni Manuel.
Samtang ang team nilang Police Inspector Judith Besas ang nakadakop usab sa usa ka Bryndon Baylosis, 32, sa sitio Saac 1, barangay Buaya ug nakuhaan og 21 ka gagmay’ng pakete sa shabu. Sa dakbayan sa Mandaue, nadakpan sa kapolisan ang usa ka tawo nga nagdala og armas ug shabu sa sitio Pilapil, Umapad alas 2 pasado ang takna sa hapon sa niaging adlaw.
Ang nadakpan mao si Rodel Demapi alyas Cocoy, 24, kinsa nakuhaan og duha ka paketeng shabu, kalibre .357 magnum nga adunay duha ka bala.
Si Demapi gialarma human nagpakita sa gidala nga armas nga giloklok sa hawak.
Dihang girikisa sa kapolisan maoy nakuha gawas sa armas ang duha ka paketeng shabu ug mga tinfoil. – /GMR) (BANAT NEWS)
- Latest
