MLC uyon na nga putlon ang mga acacia
CEBU, Philippines- Human sa pagsupak, niuyon na ang Movement for Livable Cebu (MLC) nga putlon ang lima ka punoan sa acacia daplin sa karsada sa dakbayan sa Naga hangtud sa Carcar.
Kini human sa gihimong inspeksiyon sa MLC diin nasuta nga ang lima ka punoan nilapas na sa karsada ug peligro sa mga motorista.
Si Macaraig Canton, lead convenor sa MLC, nipadayag sa ilang sugyot sa suwat nga gipadangat ngadto sa rehiyonal nga buhatan sa Department of Environment and Natural Resources (DENR) ug Department of Public Works and Highways (DPWH).
Sa iyang bahin, si Gob. Hilario Davide III nagkanayon nga ang pagputol sa mga gabok nga kahoy mapadayon.
Si Davide nisuwat kang DENR Sec. Ramon Paje sa paglibkas sa pagsuspenso sa permit sa pagputol apan wala siya kadawat og tubag.
Mopadangat usab si Davide og suwat kang DPWH Sec. Rogelio Singson kabahin sa maong problema.
Niadtong Martes, 34 ka punoan sa kahoy nga gilangkuban sa agoho, mahogany, narra ug neem tree ang gipangputol sa dakbayan sa Naga diin nakita ang dagkung lungag sa punoan ug delikado na nga matumba.
Ang hepe sa Provincial Environment and Natural Resources Office (PENRO) nga si Atty. Chad Estella mipasusi kung gituman ba sa dakbayan sa Naga ang lagda nga sa matag usa ka kahoy nga putlon hulipan kini sa pagtanum og 100 ka punoan. (BANAT NEWS)
- Latest
