Barangay Hall gilungkab
CEBU, Philippines – Gilungkab sa wala mailhing lalaki ang barangay hall sa Poblacion Oriental sa lungsod sa Consolacion sa miaging adlaw. Base sa imbistigasyon sa kapolisan nga pasado alas 7:00 sa miaging buntag padulong na unta mangabli sa barangay hall si Jerome Lim, ang treasurer sa maong barangay.
Apan dako niyang kakurat nga naguba na ang lock sa pultahan, sa pagsusi sa sud wala na ang monitor sa computer nga mokabat og P8 mil, usa ka relo ug salapi nga mobalor og P8 mil.
Way matudlo nga suspetsado sa maong krimen, wa usab matino kun nganong way nagbantay sa maong buhatan.
Samtang nasikop sa kapolisan ang usa sa duha ka lalaki nga milungkab sa duha ka balay sa usa ka babaye nga misakiyo sa P50 mil nga balor sa mga butang sa Barangay San Isidro sa dakbayan sa Talisay.
Ang biktima naila nga si Antoniette Mondigo, 30. Samtang ang nasikop naila nga si Jason Bacalso, 21, taga Barangay Tabunok sa dakbayan sa Talisay.
Gikatahong nakuha sa duha ang laptop, tablet, relo, alahas ug salapi nga P300. Apan walay swerte ang usa ka suspek tungod kay nailhan man kini sa tag-iya sa balay ug gipadakop. – /EIM) (BANAT NEWS)
- Latest
