Nangawat sa tindahan miikyas samtang nag-areglo
CEBU, Philippines - Usa ka 26-anyos nga babaye nga gitanggong sa kapolisan tungod sa pagpangawat sa usa ka tindahan, ang nakaipsot sa lungsod sa Balamban samtang nakig-settle unta sa management ang bana niini.
Matud pa ni Senior Police Officer 1 Jose Villarino, chief investigator sa kapolisan sa Balamban , ang suspek mao si Gerlyn Rico nga taga Sangi, Toledo City. Si Rico nadakpan sa mga guwardiya sa usa ka mall sa Balamban.
Ang bana sa babaye miadto sa buhatan sa kapulisan kauban ang representante sa management sa mall aron unta hisgutan ang posibleng pag-areglo sa reklamo batok sa iyang asawa.
Hapit na unta masulbad ang problema apan giingon nga midagan gawas sa Balamban Police ang suspek.
Gumikan sa hitabo ang management sa maong mall ang nakahukom na lang sa pagpasaka og kaso batok sa maong babaye.
Ang duty nga police niadtong hitaboa naila nga si Police Officer 1 Alexander Camurot kinsa gimandoan sa ilang hepe, Senior Inspector Cesar Misola, nga paesplikaron.
Si Senior Superintendent Noel Gillamac ang hepe sa Cebu Provincial Police Office mimando na ‘sab sa Provincial Investigation and Detection Management Branch pinangulohan ni Superintendent Rodolfo Albotra nga mohimo gilayon og imbestigasyon sa maong hitabo. Hangtod karon padayon pa nga gipangita sa kapulisan ang maong babaye human nga tulin kini nga midagan ug wala na gayod madakpi pa. (BANAT NEWS)
- Latest