Pito ka ‘tulisan’ nakuhaa’g mga armas, granada

CEBU, Philippines - Mga high powered nga armas ug duha ka granada ang nasakmit sa kapulisan sa dakbayan sa Carcar, gikan sa pito ka mga lalaki nga gidudahang mga tulisan ug tigpayuhot og drugas atol sa pagpangronda.

Ang operasyon gilusad diha sa Sitio Magsipit, Barangay Liburon sa maong siyudad nga miresulta sa pagkasikop nila ni Marjun Del Rosario, 23, taga Valladolid, Ronnel Lauron, 21, taga Sitio Awayan, Poblacion III, Jayjun Responso, 24, Arnel Larrobis, 30, taga Can-asujan, Ronald Lapinig, 29, ug Janrey Matugas, 20, taga Sitio Awayan, Poblacion III.

Matud pa ni Superintendent Teodulfo Manatad III, ang hepe sa Carcar police, dunay misumbong kanila kabahin sa presensiya sa mga armadong tawo sa maong lugar nga magsuroy -suroy ini og gabii.

Sumala pa ni Manatad nga ila gilayon nga gisubay ang maong lugar ug ilang nasigpatan ang usa ka lalaki nga nagtungtong sa taas sa kahoy ug gihulagway ni Manatad nga spotter sa maong grupo.

Sa pag-aksyon og balik sa kapulisan gisugat sila og buto-buto sa armas  hinungdan nga dali silang mibalos hangtud nga nahitabo ang ginukoray.

“Nakaandam ‘ta og gamit ba nakadala mi og tag-as (armas) so ang back up namo mao’y mi-fire back sa ilaha, pagkabantay nila nga pulis diay didto na nagdinaganay, sa punuan sa kahoy naa po’y nagbantay, spotter nila,” sigun pa ni Manatad.

Ang pito ka mga nasikop ang gikatahong midagan sa usa ka balay nga gipanag-iya  ni Lapinig nga dali ‘sab nga nababoy sa kapulisan.

Sulod sa balay nga gitagoan sa pito ka mga lalaki nakuha ang duha ka granada, usa ka KG9 sub machine pistol, usa ka .357 revolver, tulo ka bala sa shotgun, tulo ka bala sa .22 revolver, usa ka bala sa M14 rifle, ug drug paraphernalia.

Matud pa ni Manatad nga ang mga dinakpan maoy gidudahang responsable sa mga nahitabong tulis sa mga lending collectors sa ilang lugar ug nalambigit usab sa ilegal nga drugas.

Sa pakighinabi sa mga tigbalita sa mga suspetsado, dali sab kini nga mihimakak sa pasangil.

“Dili g’yud na amoa nang mga armas sir, ambot kang kinsa na,” dungan nga mitingog ang  pito ka mga dinakpan.

Samtang ang gitumbok nga spotter sa grupo nga nagtungtong sa taas sa kahoy nga si Ronnel Lauron ang mihimakak nga siya ‘spotter’ kay igo ra siyang misaka aron makakita kun dunay moabot nga sakyanan nga iyang masakyan pauli.

Giangkon hinoon sa usa sa mga dinakpan nga si Lapinig nga tiggamitan kini og drugas  apan dili sila mga tulisan. Sa buhatan sa kapulisan sa Carcar, duna na’y dili mominos tulo ka mga tawo nga nabiktima sa pagpanulis ang mitan-aw sa panagway sa  pito.

Gipaubos na sa ballistic examination ang nakuha nga mga armas gikan sa mga dinakpan sa pamasin nga ang maong mga armas ang gigamit sa mga nahitabong patay sa maong dapit.  (BANAT NEWS)