Drugas maoy hinungdan

CEBU, Philippines – Dili makatoo ang inahan sa tulo ka mga bata nga patay na ang iyang mga anak, inahan ug mismo ang iyang bana nga maoy mihimo sa krimen niadtong Domingo sa hapon diha sa Sitio Manlayag, Panalipan, Catmon.

Si Jomelyn Molat Figues, 28, inahan sa mga bata ug asawa sa naghikog usab nga suspek nga si Eric sa pakighinabi sa Banat News mibutyag nga wala siya kabalo kung unsay iyang buhaton.

Sigun pa ni Jomelyn nga dunay mipahibalo kaniya nga dunay “emergency” sa ilang balay ug kinahanglan nga mouli siya dayon. Nagduda siyang basin naghikog ang iyang bana nga si Eric tungod kay makadaghan na kini nga nagsige og bahad nga magpakamatay.

Nahugno

Apan nahugno ang iyang kalibutan pag-abot sa ilang lugar kay di lang ang iyang bana maoy nawala, wala nay nahibilin sa iyang mga anak nga edad 6, 4 ug 2-anyos ingon man ang iyang inahan kay giamong kini sa iyang bana. Ang mga paryente sa pamilya nga nahitaboan nga naa ra kilid nagpuyo sa balay sa mga Figues miingon nga wala g’yud silay nadungog  nga kasikas o singgit sa mga bata sa dihang gitagsa-tagsa kini  pagdunggab sa ilang amahan. Ayha lang sila nakabantay dihang ang ugangang lalaki nga si Josepher mao nay gigukod sa suspek nga si Eric.

Dagha’g samad

Sigun pa sa embalsamador nga si Elpedio Remullo, nga ang 6-anyos nga bata ang  nakaangkon kini og 14 ka samad dinunggaban nga nagsaulog sa birthday atol sa kremin, ang 4- anyos 12 ka samad dinunggaban, 2- anyos 10 ka samad Ug ang amahan duna sa’y pito ka samad. Matud pa ni Senior Inspector Jose Rovic Villarin ang hepe sa maong lungsod nga nahinabi sa Banat News, drugas ug selos ang nakita nila nga hinungdan nga nahimo kini sa amahan nga pamatyon ang iyang anak, kini gikompirmar sa asawa nga si Jomelyn.

Ang ugangan nga babaye nga si Emilda Molat, 47, kinsa misusi sa mga apo apil sa gisugat og dunggab sa diha palang sa pultahan.

Way labot sa drawing

Gipakita ‘sab ni Villarin sa Banat News ang gihimo nga suicide note ni Eric alang sa iyang tagsa tagsa ka mga anak ug sa iyang asawa ug nangayo na kining daan og pasaylo ug puno siya sa paghigugma sa iyang pamilya.

Tungod niini, nagtoo si Villarin nga dili gayod tuyo sa amahan nga patyon ang mga bata, apan naglibog ang mga imbestigador kung nganong giapil niya kini.

Kini base sa narekober nga mga papel diha sa crime scene uban sa sinulat nga suicide note sa suspek nga pinetsahan niadto pang bulan sa Marso ning tuiga. Duna pa kini mga gipang-drawing nga mga imahe sa iyang pamilya, siya ug iyang asawa, ug mga anak nga naghawira’y sa ilang mga kamot. Apan sa sunod nga drawing, ang lalaking nagrepresentar kang Eric dunay “X” nga marka, samtang ang asawa ug ang tulo ka anak naghilak. Nakabutang usab ang birthday ni Eric, Born-08-31-1986 ug gisumpayan kini og “Died on 10-__-2014.” Aminado ang asawa nga sa dihang nagsugod na og gamit og drugas ang iyang bana nausab na ang kinaiya niini ug sigehan na siya og pasangil nga duna kini lalaki.

Epekto sa drugas

Si Dr. Rene Obra, ang pangulo sa Center for Behavioral Sciences sa Vicente Sotto Memorial Medical Center (VSMMC) mibutyag nga daghang anggulo ang makonsiderar kun nganong nahimo ni Eric ang maong krimen.

Usa sa gidudahan ni Obra ang epekto sa ginadiling drugas tungod kay wala may problema nga naghisgot og pinansyal sa iyang pamilya. Matud pa ni Obra ang shabu makausab sa lihok, inistoryahan ug kinaiya sa tiggamitan niini ug moabot kini sa punto nga ma-paranoid na ang usa ka tawo. Samtang ang pagsuwat niya og suicide note, matud pa ni Obra, epekto na kini sa “withdrawal depression” tungod sa paghunong og gamit og drugas. Dugang pa ni Obra nga posible nga nakasinati og hallucination si Eric sama sa pagkadungog og tingog nga nagmando kaniya sa pagpatay sa iyang anak ug ugangan.

Sigon pa sa doktor nga dunay duha ka klase nga krimeng susama niini, emotional ug non-emotional offenders. Si Eric sa tan-aw ni Obra usa ka “emotional offender” nga nagpasabot nga na-guilty kini human niya napatay ang mga biktima mao nga nagkutlo kini sa iyang kinabuhi. Giawhag ni Obra  kadtong pamilya nga dunay sakop nga nagumon sa ilegal nga drugas nga patambalan silang daan. Si Villarin ang nangayo na og tabang sa taga DSWD aron mapaubos sa stress   de-briefing ang inahan aron kini dili makahunahuna pagbuhat og dautan. -/EIM) (BANAT NEWS)