Pro-Democracy protesters sa Hong Kong migamay na lang
CEBU, Philippines - Nagkagamay na lang ang mga tawo nga nagpabiling nagprotesta sa mga kadalanan sa Hong Kong human nga mihatag og deadline ang kagamhanan nga mopahawa sa mga lugar nga ilang giokupar.
Matud pa nga nakabalik na kagahapon ang mga empleyado sa gobiyerno human gialirongan sa mga raliyista ang ilang mga buhatan.
Nasuko og maayo ang mga pro-democracy protesters sa Hong Kong tungod sa gihulagway nila nga ang China maoy nagbuot sa kung kinsa ang mokandidato sa umaabot nga eleksyon sa 2017, matud niya kalapasan kini sa kasabotan tali sa United Kingdom ug sa China.
Ang maong kasabotan usa sa mga kondisyon sa UK dihang ilang gibalik ang kontrol sa Hong Kong ngadto sa China.
Nahimong bayolente ang panagbangga sa mga raliyista ug mga polis ug misamot pa g’yud kini dihang dunay mga taga Hong Kong nga pro-Beijing ang nakigharong sa mga nagprotestang pro-democracy.Sa pagkakaron gatosan na lang ang mga nagprotesta apan matud pa nga wala mabalaka ang mga aktibista tungod kay kinahanglan mopahuway ‘sab ang mga tawo. (BANAT NEWS)
- Latest
