Tulo ka armado nasikop
CEBU, Philippines - Sikop sa mga sakop sa City Intelligence Branch ang tulo ka lalaki nga gidudahang mga gun-for-hire ug mga sakop sa grupo sa pagpanulis sa dakbayan sa Sugbo.
Kini human girespondehan sa kapolisan ang taho sa mga armadong tawo nga nasigpatan sa may Ayala access road, Mabolo pasado alas 7 sa miaging gabii.
Ang mga nasikop naila nga sila si Ronnie Daug-daug Lapi, 35, nagpuyo sa maong lugar ug nakuhaan sa usa ka .357 revolver nga duna’y unom ka bala ug usa ka granada; Romeo Baldidos, 39, taga Laray, Carreta nga nakuhaan og usa ka .38 revolver nga may lima ka bala ug Melvin Ollamot, 24, taga Ponce I, Carreta nga nakuhaan sab og usa ka .38 revolver nga may unom ka bala.
Matud pa ni Insp. Gomersendo Mandawe, deputy chief sa CIB sa Cebu City Police Office, nag-meeting ang mga dinakpan sa posibleng plano niini nga buhaton dihang gihimo ang operasyon.
Hinuon gipasabot ni Mandawe nga atol sa pagsikop sa tulo ka suspek wala kini mipakita sa pagsukol sa kapolisan.
Ang direktor sa Cebu City Police Office, Sr. Supt. Noli Romana, nanawagan sa publiko nga makig-alayon sa ilang buhatan sa pamasin nga may lain pa’ng biktima ang mga dinakpan.
Bisan gihimakak sa mga dinakpan ang pasangil, kasong paghupot og armas ug granada ang atubangon ni Lapi samtang si Baldidos ug Ollamot ang pasakaan usab og kasong paghupot og ilegal nga armas. (Jojo C. Ugdol/GMR)(BANAT NEWS)
- Latest
