Alyas Dencio, Rose, laing tulo sikop
CEBU, Philippines - Nagtingkagol na sa Cebu City Police Office detention cell ang batan-on nga notadong pusher kauban sa laing tulo human gipangsikop sa sitio Maharlika, Sambag II kagahapon sa kadlawon.
Target sa operasyon sa City Intelligence Branch (CIB) nga gipangunahan sa deputy chief, Insp. Gomersendo Mandawe, ang usa ka Dennis Tocao alyas Dencio, 22.
Nakuha gikan sa suspek ang usa ka dakung plastik nga may sulod nga 47 ka gagmay’ng pakete sa drugas.
Kauban ni Tocao nga nasikop sila si Menchie Isido, 20, taga sitio Iskepi, B. Rodriquez nga nakuhaan og mga drug paraphernalia; Robert Dondoy, 22 ug Efren Tocao, 21, taga Tambis Street, Sambag II nga nakuhaan og tagsa-tagsa ka .38 revolver nga duna’y mga bala.
Samtang sikop usab ang usa ka Rosalinda Donaldo alyas Rose, 50, anyos, minyo nga taga Abugon, Sibonga sa pagpayuhot og ginadiling drugas.
Nakuha gikan kang Donaldo ang lima ka pakete sa gituohang shabu, P850 nga gituohang halin, cellphone, tablet ug professional driver’s license nga gipanag-iya sa usa ka Peter Paul Dakay nga taga Candaguit, Sibonga.
Kauban sa kapolisan sa pagdakop kang Donaldo ang kapitan sa Abugon nga si Isidra De Los Reyes ug mga kagawad. (BANAT NEWS)
- Latest
