Nanulis nataymingan

CEBU, Philippines - Wala’y swerte ang usa sa duha ka mga tulisan human kini nasikop sa nagpatrolya nga mga pulis sa Mambaling Police Station, atol sa pagpanulis nila sulod sa usa ka Public Utility Vehicle (PUJ), sa  C. Padilla St. kagahapon sa buntag.

Ang dinakpan naila nga si Jonas Mijares (dili ang pari), 25, ug nagpuyo sa Sitio Huyong-huyong, Alaska, Mambaling ning dakbayan.

Samtang ang nabiktima sa pagpanulis naila nga si Charo Gonzalez, 25, taga Guadalupe. Sa imbestigasyon sa Mambaling Police ,  sakay sa PUJ nga 09G ang biktima ug ang mga tulisan ug pag- abot niini sa maong dapit gitionan og armas ang biktima ug gikuha ang iyang wedding ring nga kantidad P8,000.00.

Apan tayming nga duna’y nagpatrolya nga mga pulis sakay sa patrol car sa maong lugar nga gipangulohan ni SPO2 Rene Sebes nga nakabantay sa pagdali-dali og layat gikan sa PUJ sa duha ka tulisan.

Human sa mubo nga ginukoray, nasikop si Mijares ug nakuha kaniya ang usa ka .22 revolver ug ang wedding ring sa biktima. Samtang ang naka- ikyas nga kauban sa dinakpan ang naila lamang sa pangalan nga Dodong Bunso.

Gipaslak na sa karsel sa Mambaling Police ang dinakpan nga pasakaan og kasong robbery ug illegal position of fire arms.

Gipusil

Nawad-an sa ilang kinolektang salapi ang duha ka lending collector nga biktima sa pagpanulis sa managlahing takna ug dapit sa Dakbayan sa Mandaue  niadtong Lunes, ang usa sa mga biktima napusilan ug naangol.

Ang unang biktima mao si Richard Corda, 41 anyos, minyo nga taga Sitio Caimitohan, Barangay Basak, Dakbayan sa Lapu-Lapu ug lending collector sa Gibo Credit Services sa Lungsod sa Consolacion.

Si Police Officer Three  Arvin Palonpon sa kapolisan sa Presinto 3 sa Mandaue City Police Office (MCPO) miingon nga alas 3:20 nga nahitabo ang pagpanulis diha sa Sitio Basbas, Barangay Pagsabungan sa maong dakbayan.

Matud pa ni Palonpon nga gikan pa nga nagkolekta ang biktima dihang kalit nga gisugat sa duha ka wala hiilhing lalaki ug gitionan og armas dungan ang pagdeklarar nga tulis.

Gikuha sa mga tulisan ang P5,000 sa biktima ug cellphone, apan wa pa g’yud matagbaw, gipusil pa ang tuong tuhod sa biktima hinungdan sa paghilandig niini sa tambalanan.

Nagmotor

Ang ikaduhang pagpanulis nahitabo alas-3 ang takna sa hapon sa mao gihapong adlaw sa Barangay Paknaan sa maong dakbayan ug ang biktima giila nga si Esperedion Arnada, 33, taga Lungsod sa Minglanilla ug collector sa AJL Finance Corporation sa Lungsod sa Consolacion.

Si Palonpon miingon nga gikan gihapon nangolekta  ang biktima dihang gisugat kini og duha ka lalaki nga nagmotorsiklo ug pulos nag-helmet ug gitionan kini sa armas dayong deklarar nga tulis.

Nakuha ang P5,00O nga salapi sa biktima ug ang duha ka tulisan dali kining mipabulhot sa pagpadagan sa ilang motor  padulong sa lungsod sa Consolacion.

Ang kapolisan sa Mandaue City padayon pang nagsubay sa maong mga pagpanulis. (BANAT NEWS)