Shootout sa buybust

CEBU, Philippines - Tulo ang nasikop samtang usa ang napusilan sa buy-bust operation nga gihimo sa kapolisan sa lungsod sa Medellin human giingong  misukol ang usa sa mga suspetsado kagahapon sa buntag sa Barangay Lamintak Norte sa nahisgutang lungsod.

Subject sa maong buy-bust operation ang usa ka Alvin Golisao, 33, nga gikatahong usa ka drug pusher. Samtang ang napusilan naila nga si Nemesis Victoria, 37, taga Naval, Leyte.

Lakip sa nasikop mao si Eduardo Canales, 37, nga molupyo sa maong lugar ug gikatahong bata-bata ni Golisao.

Sumala pa nga bisperas sa kapistahan sa maong barangay hinungdan nga kusog ang pagpaninda og ilegal nga drugas sa maong lugar ug giingong di mamaligya og drugas si Golisao sa iyang balay kay adto ra sa kamanggahan.

Duha ka paketeng shabu ang gipalit sa polis kang Golisao bugti sa P500 nga salapi apan dihang mihamag na ang mga polis miibot og armas ang backup ni Golisao nga si Victoria apan naunhan kini sa hepe sa kapolisan sa maong lungsod nga si Senior Inspector Christopher Fernandez gamit ang Armalite Rifle.

Naigo makaduha ka higayon sa iyang dughan si Victoria ug makausa sa iyang tiyan. Gidala sa tambalanan si Victoria ug atol ning pagbalita wala pa matino ang kahimtang niini.

Nakuha gikan ni Golisao ang 80 ka gamay nga pakete nga shabu nga balor og P80 mil ingon man ang P500 nga buy- bust money ug ang duha ka gamay nga pakete nga shabu nga subject sa buy- bust.

Narekober usab ang usa ka kalibre nga .38 nga revolver nga may lima ka bala, usa ka .357 revolver nga may upat ka bala ug .22 nga kalibre nga armas.  (BANAT NEWS)