Illegal recruiter gidakop

CEBU, Philippines - Arestado ang usa ka gipasanginlang illegal recruiter sa iyang balay kagahapon sa Camarin, Vito, Minglanilla sa mga sakop sa Criminal Investigation and Detection Group-7.

Ang gidakop mao si Kirby Gonzales Racaza-Silva, 43,  human malutsi og warrant of arrest tungod sa kasong illegal recruitment ug way piyansa nga girekomendar alang sa temporaryo niyang kagawasan.

Ang warrant giluwatan ni Judge Generosa Labra sa RTC 7 Branch 23.

Sumala pa ni CIDG-7 chief, Senior Superintendent Ritchie Posadas, si Silva gipasanginlang nangilad og dul-an 2,500 ka tawo sa tibuok nasud nga iyang gipasaligan og trabaho sa Australia gamit ang iyang Intertech 8888 Agency, nga usa ka placement agency apan nagtakoban lang nga usa ka call center company.

Apan nasakpan nga di kini awtorisadong recruitment agency sa Philippine Overseas Employment Administration.

Si Silva ug tulo niya ka kawani nga sila si Jennylyn Paz, Razel Hilacan ug Robelyn Abellaneda nadakpan sa entrapment operation sa National Bureau of Investigation (NBI)-7 sa miaging tuig sa Sangi, Minglanilla tungod sa kalapasan sa Section 6 sa  Republic Act 8042 kun Migrant Workers and Filipinos Acts of 1995 .

Matud pa gireklamo siya sa mga aplikante ug gipasakaan og kasong illegal recruitment niadtong Oktubre 2013. Gipasanginlan siya nga nangolekta kanila og kwarta alang sa pagproseso sa ilang papeles apan bisan nakabayad sila niini wala sila makatrabaho sa Australia.

Si Silva mitug-an sa mga tigbalita kagahapon nga nakugang siya nganong nalutsan siya’g warrant nga giulian naman niya og P450 mil ang mga reklamante.

“Unfair sa akong part kay wa man ko’y idea na naa pa’y warrant nga continuous man among payment sa ila,” matud niya, gani duna namay affidavit of desistance ang pipila sa mga reklamante.

Gidakop ang iyang bana human giingong nakuhaan kini og .45 pistol nga may unom ka bala, ug usa ka caliber .38 atol sa pagronda kagahapon.

Apan si Rogelio mihimakak niini. (BANAT NEWS)