Duha gipamusil

CEBU, Philippines – Duha ka mga tawo ang gipamusil sa managlahing dapit dinhi sa lalawigan sa Sugbo. Gipusil patay ang usa ka lalaki human kini nakiglalis sa asawa sa suspek diha sa Sitio Crossing, Barangay Poblacion Oriental, Consolacion niadtong miaging Sabado.

Ang namatay mao si Patrocinio Antolijao Roa Jr., 37, kinsa nakaangkon og daghang samad pinusilan ug namatay. Ang gitumbok nga suspek mao si Arnito Gonzaga Lagahit, 50, silingan sa biktima.

Si SPO2 Aldin Abayabay sa Consolacion Police Station miingon nga sa wala pa ang hitabo, nag-away ang biktima ug asawa sa maong suspetsado.

Wa pa masayri sa kapolisan kong unsay gilalisan sa biktima ug sa asawa sa suspek, apan ang naulahi wala mahimuot sa pagtratar sa biktima ngadto sa iyang asawa hinungdan sa kapungot niini ug mipusil kaniya upat ka higayon.

Ang suspetsado daling misibat pahilayo ug wala kini nila maabti sa panimalay niini sa maong dapit.

Si  Abayabay miingon nga dali untang gidala ang biktima ngadto sa Eversley Child Sanitarium General Hospital apan gideklarar niini nga dead on arrival.

Upat ka mga kabhang sa kalibre .45 nga ilang gituohang gikan kini sa armas sa suspetsado ang nakuha sa crime scene.

Samtang kagahapon sa hapon, adlaw nga Domingo, usa ka Felicisimo Sanoy Gelay,73, nga residente sa Barangay Tapon, Dalaguete ang gipusil patay samtang kini naglakaw pauli diha sa Sitio Sulong-on sa mao gihapong barangay.

Matud pa ni Police Officer Two Reynaldo Vidas nga gikahinabi sa Banat News base sa imbestigasyon ni SPO3 Cleto Pia, ang biktima gikan pa sa bulangan dihang gisundan kini sa usa ka lalaking nagmotorsiklo.

Pag-abot sa maong dapit, kalit kining gipusil sa ulo nga maoy hinungdan sa iyang hinanaling kamatayon. Wa pa matino kong unsay motibo sa maong pagpatay. - /EIM) (BANAT NEWS)