Kalag nagpakita

CEBU, Philippines - Nagkagubot ang mga residente sa Sitio Pasil, Barangay Loon, Daanbantayan, Cebu, human nga matud pa nagpakita ang kalag sa bata nga gipatay ug gilabay sa kasagbutan nga bahin sa maong lugar ug gitultolan ang mga tawo ug mga polis kung asa nahimutang ang iyang lawas.

Matud pa ni Police Officer  3 Rey Aballe, team leader sa kapulisan sa maong lungsod nga nahinabi sa Banat News, nga usa ka amang usab ang nahimong yawe sa pagkasikop sa suspek nga si Alberto Hermosa, 28, bayaw sa biktimang si John David Diano. Ang amang nga si Benjie Molejon, 21, mitumbok kang Alberto Hermosa, 28, bana sa maguwang sa bata maoy nakita niyang mibinaklid ug mibunal-bunal og kahoy sa biktima niadtong adlaw nga Domingo samtang siya pauli na gikan nanagat.

Matud pa ni Aballe nga Domingo pa na-missing ang maong bata, ug kagahapon giingong nakit-an kini sa mga amiga ug miingon nga dili kini makauli sa ilaha. Gani duna pay mga silingan niini nga nakakita usab sa bata kagahapon ug ilaha kining gitawag kay gipangita kini sa iyang mama, apan giingong mitubag ra usab kini nila nga “di na siya makauli.”

Gani mibutyag si Abella nga duna pay residente ang nangangkong iyahang gikuptan ang bata apan wala siyay nahikapan ug midagan kini paingon sa Sitio Cabatangan mao nga gigukod sa mga tawo.

 Si PO2 Macarthur Monsanto, tourist police nga nadestino sa maong lugar ang apil sab nga migukod sa bata nga midagan paingon sa kasagbutan nga bahin apan wala kini didto apan nakatimaho sila og baho sa lugar ug sa ilang pagsubay, ilang nakita ang lawas niini nga gibinaklid ug may gipaslak nga panapton sa baba nga wa nay kinabuhi.

Nasuta sa kapulisan gikan sa mga residente nga niadto pang Domingo si Molejon nagsige og senyas kanila nga nakakita kini nga dunay gipatay sa maong dapit. Ug pinaagi sa senyas gimustra niini sa mga imbestigador ang iyang nakita. Matud pang Aballe, ang amang base sa pag-interpret sa senyas niini mitug-an nga iyaha untang gipakgang ang suspek apan giingong gisumbag ug gibunalan siya niini og kahoy hinungdan sa iyang pagkaratel og dagan ug misumbong sa mga tawo, apan way mituo niini.

Gikatahong gipakurasyonan si Molejon aron pagtino sa pangangkon niini ug nasuta nga duna gyud kini mga bun-og sa lawas. Tungod niini gidakop dayon si Hermosa ug sa dihang nag-abot ang duha sa presinto positibo kining gitudlo ni Molejon. Matud pang Aballe, hugtanong gihimakak ni Hermosa ang maong pasangil, apan nahibaw-an ni Aballe nga naglagot si Hermosa sa bata kay wa bantayi ang anak niini  kay mamasahero unta kini ug nahibaw-an niyang naligo hinuon sa dagat ang biktima. (BANAT NEWS)