Rama makabaligya na sa SRP

CEBU, Philippines - Human sa taas nga deliberasyon, aprobado na ang paghatag og katungod kang Cebu City Mayor Michael Rama nga makabaligya sa Lot 7 ug 17 sa South Road Properties. Atol sa sesyon kagahapon, gipasar sa konseho sa siyudad ang resolusyon nga maghatag og katungod sa mayor sa paghimo og negosasyon sa buot mopalit sa yuta sa SRP.

Ang mga niuyon sa resolusyon mao silang Konsehal Richard Osmeña, Gerry Carillo, Roberto Cabarubias, Noel Wenceslao, Mary Ann De los Santos, Philip Zafra, Hans Abella, Dave Tumulak ug James Cuenco.

Samtang silang Konsehal Nida Cabrera, Alvin Dizon, Alvin Arcilla, Eugenio Gabuya Jr., Nestor Archival Sr., Lea Japson ug Sesenio Andales ang wala miuyon.

Nalipay si Rama kinsa toa pa sa gawas sa nasud sa maong kalamboan. Giklaro sa mga konsehal nga dili ang politika ang hinungdan sa pagkalangan sa pagpasar sa resolusyon apan tungod kay ilang gitun-an og maayo ang pagbaligya sa luna sa SRP. (BANAT NEWS)