“Kawatan” gipasok sa imburnal

CEBU, Philippines - Nagsugod na sa pagpanimaho ang patay’ng lawas sa usa ka wala pa hiilhing lalaki nga giugkat  sa mga sakop sa Scene on Crime Operation (SOCO) ug mga polis sa Presinto 2 sa Mandaue City Police Office (MCPO)  gikan sa imbornal sa reclamation area, Barangay Subangdaku, Dakbayan sa Mandaue kagahapon sa hapon niadtong Martes.

Ang gwardiya sa MI Business Center nga nahimutang sa reclamation area sa Barangay Subangdaku, dakbayan sa Mandaue  nga si Marvin Villagracia, 20, nga temporaryong nagpuyo sa Sambag 2, dakbayan sa Sugbo  maoy miangkon nga maoy nakapusil sa wala hiilhing lalaki nga gituohan niyang kawatan ginamit ang  nailog niya nga  kalibre .357 nga armas  sa biktima.

Si  SPO1 Michael Limalima sa kapolisan sa Presinto 2 sa MCPO miingon nga gialigar ni Villagracia nga kalit lang  misulod sa compound ang maong  lalaki niadtong Domingo sa gabii ug gipanguha ang mga cable wire steel  ladder hinungdan nga  iya kining gibadlong.

Apan gikatahong nasuko ang lalaki ug kalit miibot og armas nga kalibre .357 ug gition kini ngadto kaniya hinungdan nga iyang gihamagan hangtod nga nailog ang armas ug napusilan kini makadaghan hangtod nga namatay.

Matud pa ni Limalima, tungod sa kahadlok sa gwardiya iyang giguroy ang lawas ngadto sa imburnal ug tibuok adlaw niadtong Lunes nagpadayon gihapon kini sa iyang duty nga wala gayod mosulti sa mga kawani ug nagdumala sa gibantayan niining establisamento.

Apan dangtan ang usa ka adlaw nakahukom  si Villagracia sa pagtug-an sa tagdumala sa gibantayan niining establisamento niadtong Martes. Ang mga sakop sa SOCO sa PNP Crime Laboratory mao nay miugkat sa patay’ng lawas nga gipasok ngadto sa ilawom.

Si Villagracia  temporaryo  karon nga gitanggong sa detention cell ug gipaabot pa nila ang mga tagtungod pag-ila ug sa pagpaubos sa awtopsiya pagsuta kun ang .357 nga armas nga gitahan kanila ni Villagracia mao  ba gayud ang nakapatay niini. (BANAT NEWS)