Online application sa napolcom gilusad

CEBU, Philippines - Pagpangaplay sa pagkapolis mahimo na pinaagi sa online application sumala pa sa National Police Commission (NAPOLCOM-7).

Ang Online Examination Application Scheduling System (OLEASS) gihimo aron mas masayon alang niadtong mga buot nga magpolis ug kadtong buot nga mangaplay sa ilang promosyon.

Nasayran nga dunay mga aplikanteng gusto nga makasud sa pagkapolis ang mogasto og dako aron lang molinya ug mosumitir sa ilang aplikasyon ug aron mokuha og Philippine National Police Entrance, pinaagi sa online application di na kinahanglang maghago-hago og adto ang aplikante.

Mahimo kining matan-aw sa  www.napolcom.gov.ph website sa Napolcom. Mao usab ang tumong niini alang niadtong mga polis na nga buot mokuha og Promotional Examinations. Pabor kini niadtong mga nadestino sa lagyo nga assignments nga maglisod og biyahe padung sa Cebu City aron lihukon ang ilang aplikasyon.

Ang maong online applications magsugod sa Agosto 11 ug matapos sa Agosto 15, 2014.   Samtang ang PNP Promotional Examination gitakda sa Agosto 18 hangtud sa Agosto 22 ning tuiga gihapon.

Ang maong sistema magtugot sa computer nga direktang mo-schedule sa petsa ug oras sa filing ug processing sa applications sa mga regional offices aron malikayan ang taas nga linya sa mga aplikante.  (BANAT NEWS)