Maestro, bata nalatayan sa trak

CEBU, Philippines - Patay ang maestro ug ang iyang backrider nga iya ra sab nga pag-umangkon human sila nalatayan sa usa ka cargo truck nga gimaneho sa drayber nga hubog diha sa Balisong, Argao  sa nakalabay nga gabii.

Ang mga biktima giila nga sila si Ferwin Sardual, 28, ug Andry Sardual, 11, pulos nagpuyo sa maong lugar.

Samtang ang drayber sa cargo truck naila nga si Felixberto Ruba, 46, taga dakbayan sa Mandaue. Matud pa ni PO2 Paulino Sanchez sa Argao Police Station nga nahinabi sa Banat News nga parehong paingon sa habagatan ang trak ug ang mga biktima. Sumala pa nga mihunong ang motor sa mga biktima ug uwahi nang nakabantay mao nga nalatayan gyud ang duha dayon ikyas apan pag-abot sa Dalaguete napasok sa koral sa usa ka balay ang trak.

Sumala pa ni Sanchez kasong reckless imprudence resulting to multiple homicide, damage to property ug driving under the influence of liquor ang ipasaka sa  drayber. (BANAT NEWS)