Tanod sa Duljo-Fatima dili kunsabo sa drug pushers

CEBU, Philippines - Gilabanan ni Duljo-Fatima Barangay Kapitan Elmer Abella ang iyang mga tanod nga gipasanginlang wala moabag dihang gironda sa kapolisan ang balay sa mga gidudahang drug pushers sa ilang barangay sa miagi’ng semana.

Matud ni Abella nga dili tinuod nga ang iyang mga tanod kakunsabo sa mga tigbaligya og ilegal nga drugas sukwahi sa pagduda sa kapolisan tungod sa pagdiki-diki nila pagsaksi sa pagpangronda.

Gitataw sa kapitan nga ang kapolisan wala makigtambayayong kanila’ng daan aron unta madestinohan og tanod nga muabag sa gihimong pagpangronda.

Nangatarungan si Abella nga ang mga tanod mipauli na diha nga miabot ang ilang “off” ug ang duha sa tulo ka tanod nga mibanos kanila sa pag-duty adunay girespondehan.

Giangkon hinuon sa kapitan nga ang usa ka tanod nagduha-duha sa pagsaksi nga siya ra’ng usa. Ang mga tanod nga gamiton sa kapolisan sa pagsaksi sa ronda mahimo’ng ipatawag sa husay sa kaso sa korte.

Matud sa kapitan nga andam sila nga mopasabot sa ilang sitwasyon kun adunay pagahimuon nga imbestigasyon.

Ang kapitan miangkon nga nailhan niya ang uban sa mga tigbaligya og ilegal nga drugas sa iyang barangay ug gani iya pa kini nga giawhag nga mo-undang na sa ilang negosyo. Si Abella miingon nga wala na siya mohatag og impormasyon sa kapolisan kay nasayud siya nga ang mga polis dugay na nga nakaila kinsa ang mga dakponon sa iyang barangay. (BANAT NEWS)