Papa gipatay sa anak

CEBU, Philippines - Usa ka amahan ang giingong gidunggab-patay sa kaugalingon niining anak nga giingong may deperensiya sa pangisip nga napusilan usab sa mirespondeng kapolisan diha sa Sitio Bacay, Barangay Tulay sa  lungsod sa Minglanilla, kagahapon sa kaadlawon. 

Giila ang biktima nga si Saturnino Labiste, 52,  samtang ang anak niini mao si Rayden, 20, kinsa napusilan sa kapulisan human giingong mihamag sa  mga mirespondeng pulis.

Nasayran nga si Labiste ug iyang anak nagtupad og katulog nianang tungora apan sa walay igong hinungdan kalit nga gidunggab ni Rayden ang iyang amahan  sa  ulo ug tiyan.

Matud ni Senior Inspector Richard Gadingan, hepe sa Minglanilla Police Station giingong nasulod-gawas na sa rehabilitation si Rayden tungod sa deperensiya niini sa pangisip sukad pa iyang pagkabata. Ang mga kasilinganan sa biktima giingong nakadungog og komosyon hinungdan sa pagtawag nila og polis.

Apan dihang miabot ang mga polis gikatahong nag-wild si Rayden ug giatake sila si PO2 George Campomanes, PO1 Ronilo Salas ug SPO1 Renato Masangkay nga nianang tungora nakig-estorya kaniya.

Apan inay mopatuo giingong suway nga giatake ni Rayden si PO2 Compomanes gamit ang kutsilyo hinungdan nga giunhan kini pagpusil ni PO1 Salas sa walang tiil.

Si Rayden daling gidala sa tambalanan apan wala na maluwas pa ang amahan niini. Gikatakdang pasakaan ugmang adlaw og kasong parricide si Rayden. (BANAT NEWS)