Endangered birds nasakmit

CEBU, Philippines - Mga endangered nga mga langgam ihalas nga naglakip sa mga agila ug banog ang nasakmit sa mga awtoridad gikan sa duha ka mga lalaki atol sa gihimong buy-bust operation kagahapon sa buntag sa San Roque, dakbayan sa Talisay.

Ang Provincial Environment Office Task Force on Illegal Species ug Department of Environment and Natural Resources misakmit sa nagkadaiyang klase sa langgam alas-10 kagahapon sa buntag didto sa Barangay San Roque Dakbayan sa Talisay.

Lakip sa mga nasakmit mao ang duha ka Philippine Hawk Eagle nga nagkantidad og P6, 000 matag usa. Usa ka serpent eagle nga gibanabanang mokantidad og P2, 000.

Nasakmit usab ang unom ka cockatoo nga gihulagway nga critically endangered na, matud pa sa DENR Chief Ariel Rica apan gibaligya lang og P1, 000 kada usa. Nasakmit sab ang usa ka Amethyst Brown Dove.

Ang masakpan nga ilegal nga namaligya og mga critically endangered nga mga langgam adunay silot nga pagkapriso sulod sa duha ngadto sa upat ka tuig samtang sa mga endangered nga langgam usa ngadto sa duha ka tuig nga pagkapriso ang silot.

Matud ni Rica ang DENR magpadayon sila sa kampanya batok sa pagpanguha og mga ihalas nga mga mananap. (/EIM)(BANAT NEWS)