Duha ka pushers sa Lapu sikop
CEBU, Philippines - Gidungan pagsikop sa kapolisan ang duha ka drug pushers atol sa gihimong buy-bust operation sa managlahing dapit sa dakbayan sa Lapu-Lapu niadtong Lunes sa gabii.
Unang girumbo sa mga sakop sa City Anti Illegal Drug Special Operation Task Group (CAIDSOTG) pinangulohan ni Senior Insp. Rogelio Pineda Jr. ang sitio Saac, barangay Buaya diin ang magsoong Levy Roylan Panuan alyas Roy, 38, ulitawo ug ang igsoon niini nga si Lemy Panuan maoy target sa kapolisan.
Atol sa maong operasyon, si Lemy daling nakasibat dala ang buy-bust money ug ubang ebidensiyang shabu.
Samtang si Roy maoy nasikop ug nakuhaan og tulo ka gagmay’ng pakete sa gituohang shabu sa iyang posisyon lakip na ang kagamitan sa pagsuyop.
Sunod nga nasikop si Joven Gestopa sa operasyon sa barangay Canjulao.
Nakuha gikan ni Gestopa ang balor P200 nga marked money, lima ka gagmay’ng pakete sa gituohang shabu ug mga gamit sa pagsuyop.
Matud ni Pineda padayon ang ilang operasyon batok ilegal nga drugas sa dakbayan sa Lapu-Lapu inubanan sa Philippine Drug Enforcement Agency. (BANAT NEWS)
- Latest
