Nag-ayo sa linya sa kuryente nakuryentihan

CEBU, Philippines - Nalandig sa tambalanan ang usa ka lalaki human nakuryentihan samtang nag-ayo sa linya sa poste sa kuryente sa kilid nga bahin sa Barba Sports Complex sa Barangay Poblacion, dakbayan sa Toledo kagahapon sa buntag.

Si Virgilio Cristota, taga Sitio Cabulihan,  Barangay Ilihan sa maong dakbayan usa ka lineman sa Cebu Electric Cooperative(CEBECO) III gitabang sa mga kauban human kini nakuryentihan ug nawad-an og kusog.

Sumala pa nga giayo sa maong lineman ang linya sa kuryente sa maong dapit human kalit nga nag-brownout.

Matud pa nga samtang nag-ayo ang biktima sa linya sa kuryente nadungog na lang ang kusog nga paglagapak ug dunay mibuto ug nakit-an nga mikayo ang lawas sa biktima.

Daling nanawag og tabang ang mga residente nga niadtong tungora nagtan-aw sa gibuhat ni Cristota human ilang nakita nga  susama kini nga naupos nga kandila ug nawad-an na sa umoy sa ibabaw nga bahin sa poste.

Tungod niini daling misaka ang iyang mga kauban luwan sa boom truck ug gikuha si Cristota nga wala nay panimuot.

Nasayran nga  pasado alas-6 kagahapon sa buntag nagsugod na sa brownout  sa pipila ka bahin sa dakbayan sa Toledo human usab nga gi-off ang mainline pag-ilis sa 10 MVA nga suplay sa kuryente sa CEBECO III.

Sa pakighinabi kang Virgilio Fortich, General Manager sa CEBECO III  nga iyang pa-imbestigahan ang maong hitabo sa pagsuta usab kun tinuod ang taho nga gi-ON pagbalik ang linya sa kuryente hinungdan sa pagka-kuryenti ni Cristota. Nasayran nga wala  magsuot og gloves ang biktima samtang nag-ayo sa linya sa kuryente.

Hinuon ang safety belt niini nga iyang gisuot maoy nakaluwas kaniya tungod kay nakabuhi na man siya ug nagbitay na lang tungod niini.

Dugang ni Fortich nga luwas na hinuon ang kahimtang ni Cristota sa usa sa mga tambalanan sa dakbayan sa Sugbo.  (BANAT NEWS)