Puya gilabay sa SRP

CEBU, Philippines - Napalgan sa usa ka mamasurahay ang pito ka buwan nga puya nga giputos og panapton ug gisulod og plastic bag nga nagpautaw-utaw sa kadagatan sa Gate 3, South Road Properties, Mambaling, dakbayan sa Sugbo.

Matud ni PO2 Nilo Aventurado sa Homicide Section sa Cebu City Police Office nga usa ka Nilo Almacin ang nakakita sa maong puya.

Dali niyang gipahibawo ang guwardiya nga nagbantay sa Gate 3 nga si Roelito Baylong kinsa mao na ang nanawag ug nipahibawo sa ilang opisina.

Dugang ni Aventurado nga tungod kay gitapuk-an na sa mga tawo ang dapit dali nilang gikuha ang puya ug gidala sa St. Francis Funeral Homes.

Didto ilang gihiling ang puya ug nasuta nga lalaki ang maong puya nga gibana-banang gabii pa gilabay tungod sa baho niini. Wa pa hinoon masuta sa kapolisan kun si kinsa ang naglabay sa puya sa maong lugar. (BANAT NEWS)