Duha nalumos atol sa Father’s Day

CEBU, Philippines - Duha ang gikatahong nalumos patay sa ilang pagpangaligo og dagat atol sa pagsaulog sa Father’s Day kagahapon sa Metro Cebu.

Patay ang usa ka 40 anyos nga lalaki human nalumos sa usa ka beach resort sa Barangay Pooc, Dakbayan sa Talisay ala-una sa hapon.

Wala na makaabot nga buhi sa Talisay City District Hospital si Michael Redoble Sigue, taga Barangay Lawaan II, dakbayan sa Talisay.

Si SPO1 Mikie Espina nga nahinabi sa Banat News mibutyag nga kagahapon sa buntag ang pamilya ni Sigue uban sa iyang mga paryente nag-beach party tungod kay birthday sa pag-umangkon nga lalaki.

Samtang nagsige na og pangaligo sa dagat, si Sigue giingong misulti ngadto sa iyang asawa nga nakabatyag siya og huot sa iyang dughan.

Apan bisan pa niini padayong nagsawom-sawom si Sigue sa dagat ug pipila ka minutos ang nakalabay nakit-an na lang sa iyang mga paryente sa mabaw nga bahin sa dagat nga wala na maglihok.

Samtang patay usab ang 10-anyos nga bata nga nalumos sa Tunay Beach Resort sa Barangay Looc, Lungsod sa Liloan alas 9 sa buntag.

Si SPO1 Bryan Batequin sa Liloan Police Station miila sa namatay nga si Janalisa Senajon, taga Barangay Sta. Cruz, bukirang bahin sa lungsod sa Liloan.

Matud ni Batequin nga kuyog sa biktima ang pamilya ug pipila ka mga silingan sa pagpangaligo sa dagat atol usab sa pagsaulog sa Father’s Day kagahapon.

Samtang nalingaw ang iyang ginikanan sa pagkukabildo sa ilang mga kauban kalit lang silang naalarma dihang nagpanawag sa pagpangayo og panabang ang uban pa nga mga bata.

Daling gisusi sa mga ginikanan ug kaubanan ang bata ug daling gidala sa Municipal Health Center sa Liloan apan gideklarar nga dead on arrival.  (BANAT NEWS)